Орал билігі бірқатар компанияларға өздерінің бизнес нысандарының жанында тазаланбаған қар үшін айыппұл салды

Қала әкімдігі кәсіпкерлерді-дүкендер, жанармай құю бекеттері және басқа да бизнес нысандарының иелерін-өз қаражаты есебінен маңайындағы аумақты тазартуды міндеттейді. Егер бұл жасалмаса, оларды үлкен айыппұл күтеді.

Бұл туралы Орал қаласының әкімі Абат Шыныбеков қала аумақтарын абаттандыру мәселелері жөніндегі кеңес барысында мәлімдеді.

– Ереже бойынша кәсіпкерлер бизнес-нысандар маңындағы аумақты тазарту керек. Біз оларға ескерту жасаймыз, егер олар өз маңайындағы қарды жинамаса, оларға ҚР ӘҚБтК-нің 505-бабы бойынша айыппұл салынады. Жеке тұлғалар үшін-20 АЕК (61 мың тг.), шағын кәсіпкерлік үшін-бұл 30 АЕК (91 мың тг.), ірі кәсіпкерлік үшін-40 АЕК (122 мың тг.). Өткен жылдың 1 қарашасынан бастап біз осындай 1781 бұзушылықты тіркедік, – деп хабарлады Орал әкімі Абат Шыныбеков.

Сондай-ақ, ол тазаланбаған қар үшін айыппұл алған бірнеше бизнес нысандарын атады. Бұл «Балабақша» ауданындағы «Лидер» супермаркеті, «Құрылысшы»шағын ауданындағы «Ашык Это» ЖШС және Әбілқайыр хан даңғылындағы бірнеше нысан.

Ақмарал ШАЯХМЕТОВА