Оралда қала әкімі ауысты (ВИДЕО)
Қала басшысы қызметіне Бөрлі ауданының бұрынғы әкімі Миржан Сатқанов тағайындалды. Енді бұрынғы қала әкімі Абат Шыныбеков көтеріліп– ол БҚО әкімінің аппаратын басқарады.
Қала әкімін ауыстыру туралы шешімді бүгін, 26 сәуірде Орал активінің жиналысында БҚО әкімі Ғали Есқалиев жариялады.
ҚР Президенті әкімшілігімен және қалалық мәслихатпен келісе отырып, меритократия қағидаттарына сәйкес Орал қаласының әкімі қызметіне 45 жастағы Миржан Мұнайдарұлы Сатқанов тағайындалды.
Сатқанов Миржан Мұнайдарұлы 1977 жылы Батыс Қазақстан облысында дүниеге келген.
Білімі жоғары, Түркия Республикасы Докуз Ейлюл университетін қаржы мамандығы бойынша тәмамдаған.
Еңбек жолын 2000 жылы Орал қалалық қаржы бөлімінің жетекші маманы болып бастаған.
Әр жылдары:
– БҚО кәсіпкерлікті қолдау және дамыту департаментінің бас маманы, бөлім басшысы және басшы орынбасары;
– БҚО кәсіпкерлік және индустриалдық-инновациялық даму басқармасы басшысының орынбасары, басқарма басшысы;
– БҚО жолаушылар көлігі және автомобиль жолдары басқармасының басшысы;
– БҚО әкімінің орынбасары болып қызмет атқарды.
Бүгінгі күнге дейін Бөрлі ауданының әкімі болып еңбек етті.
