Оралда екі автобустың соқтығысуынан 16 адам зардап шекті
Оқиғаға куә болғандардың сөзінше, жол апаты бүгін шамамен сағат 10.30-да Мұхит және Дәулеткерей көшелерінің қиылысында болған.
Қалада 39-бағытта жүретін «ПАЗ» автобусының жүргізушісі Дәулеткерей көшесімен келе жатып, басты көше – Мұхитқа шығарда жол бермей, 30″Д» бағытында жүретін автобуспен соқтығысқан.
Салдарынан 39-автобус қиылыста тұрған Toyota Camry автокөлігіне аударылған.
БҚО денсаулық сақтау басқармасының баспасөз қызметінен мәлім еткеніндей, оқиға орнында 5 жедел жәрдем бригадасы жұмыс жасап, барлық жарақат алғандар қалалық көпбейінді ауруханаға жеткізілді.
«Алдын ала мәлімет бойынша зардап шеккендердің бәрі де жабық бас-ми жарақатын алып, милары шайқалған. Бірқатары сынық жарақаттарын алған. Атап айтқанда, 30-72 жас аралығындағы 12 әйел, сондай-ақ 68 және 60 жастағы екі ер адам ауруханаға жатқызылды. Ал 34 жастағы ер адам емдеу мекемесінде жатудан бас тартты. Жарақат алғандар арасында үш жасар бала да бар. Ол облыстық көпбейінді балалар ауруханасына жеткізілді. Қазіргі кезде бәрінің жағдайы анықталу жатыр», – деп хабарлады ведомстводан.
БҚО полиция департаментінің баспасөз қызметі осы оқиға бойынша ҚК 345-бабына сәйкес қылмыстық іс қозғалғанын жеткізді.
