«Ақбөкен мүйізі үшін» сотталғандардың туыстары БҚО прокуратура алдына үкіммен келіспейтінін білдіру үшін жиналды (ВИДЕО)
Бүгін Жаңақала ауданындағы әртүрлі кенттердің жиырмадан астам тұрғыны облыс прокуратурасының ғимаратына келді. Сот олардың отбасыларындағы ер адамдарды, барлығы 11 адамды ҚР ҚК-нің 339-бабы «Құрып кету қаупі төнген жануарлармен және олардың бөліктерімен заңсыз қарым-қатынас жасау» бойынша 7 жыл 3 айға бас бостандығынан айырды және оларға 169 миллион теңге мөлшерінде айыппұл салды.
Олардың туыстары облыс прокуроры Серік Шалабаевтың қабылдауын талап етіп прокуратураға келді.
Жиналғандар туыстарының ақбөкен мүйіздерін тапқаны үшін сотталғанын айтты.
– Олар ешкімді өлтірген жоқ! Кісі өлтіргені үшін мұндай көп бермейді! Олар ақбөкен мүйіздерін тапқаны үшін сотталды. Сонымен қатар, сот олардың әрқайсысын 169 миллион теңгеден төлеуді міндеттеді, бұл да ақылға сыйымсыз сома! -деді, сотталғандардың туыстары эмоционалды түрде.
16 тамызда сотталғандардың туыстарының шағымы бойынша бұл іс БҚО сотының апелляциялық алқасында қаралатын болады.
Қазіргі уақытта барлық 11 адам Орал тергеу изоляторында.
Сотталушылардың туыстарына прокуратура қызметкері шығып, қазір Оралда терроризмге қарсы оқу-жаттығулар өтіп жатқанын және оларды ғимаратқа кіргізе алмайтынын хабарлады.
Жиналғандар кетіп қалды, бірақ бүгін сағат 16.00-де БҚО прокурорының қабылдауына келетіндерін айтты. Белгіленген уақытта адамдар қайтып келді. Оларды қадағалау органының ғимаратына шақырды, онда олар облыс прокурорының атына туыстарына қатысты үкімді жеңілдету туралы ұжымдық хат жазды.
Талғат Омаров
