Жаппай оқыту қорынан 37 мың теңгеден: кім қалай ала алады?
Балалардың ата-аналарына материалдық көмек енді ақшалай төленетін болады.
Білім министрлігінің тиісті қаулысы 2022 жылдың 19 тамызынан бастап күшіне енеді.
Материалдық көмек келесі санаттар бойынша беріледі:
1) Мемлекеттік атаулы әлеуметтік көмек алуға құқығы бар отбасылардан шыққан балаларға;
2) жан басына шаққандағы табысы ең төменгі күнкөріс деңгейінен төмен, мемлекеттік атаулы әлеуметтік көмек алмайтын отбасылардан шыққан балаларға;
3) жетім балаларға және ата-анасының қамқорлығынсыз қалған балаларға;
4) ТЖ салдарынан шұғыл көмекті талап ететін отбасылардан шыққан балаларға;
5) білім беру ұйымының алқалы органы айқындаған білім алушылар мен тәрбиеленушілердің өзге де санаттарына жататындарға.
Осы санаттағы балалардың ата-аналары мектеп директорының атына өтініш жазуы керек.
Ақшаны өз шотына алғаннан кейін ата-аналар балаға қажет нәрсені сатып алуды чектермен растауға және 15 жұмыс күні ішінде мектеп әлеуметтанушыларына есеп беруге міндетті.
Бір балаға жұмсалатын шығын орта есеппен 37 389 теңгені құрайды.
Сонымен қатар, білім беру ұйымдары 2022 жылғы 1 тамызға дейін оқушылардың мектеп нысандары мен кеңсе тауарларын сатып алды және материалдық көмектің жетіспейтін сомасының айырмасы шот карталарына аударылатын болады.
Мектеп формасымен және мектеп керек-жарақтарымен қамтамасыз етуге 127,2 млн.теңге көзделген.
