Орал-Атырау жолы өлім-жітім жиі болатын трассалар тізімінде
Үш трассаға ЖКО-да қаза тапқандардың жалпы санының 64% – ы тиесілі.
Жолдардағы ЖКО-ның негізгі себептерін ІІМ басшысы еліміздегі жол қауіпсіздігі мәселелері жөніндегі Үкімет отырысы барысында атап өтті.
Министр қала сыртындағы трассаларға ерекше назар аударды. Оларға ауыр ЖКО-ның негізгі саны, сондай-ақ қаза тапқандардың 69%-ы тиесілі.
Жамбыл (91%), Солтүстік Қазақстан (88%), Жетісу (86%), Алматы (83%), Атырау (81%), Ақмола (80%), Түркістан (72%), Павлодар (70%), Қызылорда (70%) облыстарында бұл көрсеткіш одан да жоғары.
– Жамбыл облысынан өтетін “Батыс Еуропа – Батыс Қытай”, “Алматы – Ташкент”, Атырау және Батыс Қазақстан облыстарынан өтетін “Орал-Атырау” автожолдарындағы жалпы жағдай қиын. Осы облыстардағы қаза болу фактілердің 64%-ы дәл осы учаскілерде орын алған. Негізгі себептер – қарсы жүріс бағытына шығу және жылдамдықты арттыру, – деді министр.
Бүгінгі таңда 6 мың км-ден астам жолды бірінші санатқа ауыстыру қажет.
Анықтама: ІІ-санат – ені 6-7 метрге дейін 2 жолақты облыстық және жергілікті маңызы бар жолдар және ені 5 метр болатын 2 жолақты облыстық және аудандық маңызы бар ІІІ-санаттағы жолдар.
Қала сыртындағы жолдардың қауіпсіздігіне жол бойындағы инфрақұрылым да әсер етеді.
– Өкінішке орай, жол бойында кэмпингтер, демалыс орындары, тамақтану пункттері жоқ. Осыған байланысты жүргізушілер көлікті ұйқысыз және демалыссыз басқаруға мәжбүр. Осылайша олар өзін де, өзгені де қауіпке тігеді, – деді министр.
Министр тағы бір мәселе – заңсыз тасымалдаушылар екенін де атап өтті.
– Олар жолаушыларды тасымалдау ережесін бұзып, аймақтар арасында тоқтаусыз жүреді. Ал көліктері қауіпсіздік талаптарына сай келмейді. Жалпы жыл басынан бері 800 көлік аударылған, 1 195-і ілесе қақтығысып, 1 250-і бетпе-бет соқтығысқан. Басты себеп – көлік басқару кезінде ұйықтап кету және көліктердің техникалық ақаулығы, – деді спикер.
Ол Индустрия министрлігі мен әкімдіктерге бұл бағыттағы жұмысты бірлесіп атқаруды ұсынды.
