Қырым көпірінде жанармай цистерналары өртенді

Қырым көпірінде сенбі күні таңертең жүк көлігі жарылғаннан кейін пойыз өртеніп, автокөлік жолы жартылай опырылып түсті.

Ресейлік БАҚ оқиға орнында түсірілген видеоларды жариялады. Онда темір жолдағы жанармай құйылған цистерналар өртеніп жатыр, ал параллель орналасқан автокөлікке арналған тасжолдың аралығы опырылып түскен.

Ресейдің Ұлттық терроризмге қарсы комитеті Қырым көпірінде жүк көлігі жарылғанын хабарлады.

«Бүгін таңғы сағат 06:07-де Таман түбегі жағынан Қырым көпірінің автокөлік бөлігінде жүк көлігі жарылып, Қырым түбегіне қарай бет алған теміржол пойызының жеті жанармай цистернасының тұтануына себеп болды», – деп жазылған комитет таратқан хабарламада.

Соның салдарынан екі көлік аралығы жартылай опырылып қалды.

Белгілі болғандай, бүгін таңертең жарылған жүк көлігінің қасындағы жолаушылар көлігінде болған ер мен әйелдің мәйіттері су бетіне қалқып шыққан деп хабарлады  Ресей тергеу комитеті.

Жүк көлігінің иесі Краснодар өлкесінің тұрғыны болып шықты. Марқұмның тұрғылықты жері бойынша тергеу амалдары басталды.

Айта кетсек, Қырым көпірінде жүк көлігінің жарылғанын алдымен Ресейдің Ұлттық терроризмге қарсы комитеті хабарлаған. Сол кезде Таман түбегі жағынан Қырым көпірінің автокөлік бөлігінде жүк көлігі жарылып, Қырым түбегіне қарай бет алған теміржол пойызының 7 жанармай цистернасы өртенген еді.

Қырым билігі келтірілген шығынның «ауыр сипатта емес» екенін және тез арада жөнделетінін мәлімдеді.

Қазіргі уақытта көпірдегі қозғалыс тоқтатылды, паромдық өткел дайындалып жатыр.