Сот экс-министр Елжан Біртановқа үкім шығарды

Бұрынғы Денсаулық сақтау министрі Елжан Біртановқа қатысты сот үкімі шықты, деп хабарлайды Ulysmedia.kz.

Бүгін Сарыарқа аудандық сотының судьясы Ибрагим Әлкенов бұрынғы министр мен көмекшісіне қатысты үкім шығарды.

“Қазақстан Республикасы Қылмыстық кодексінің 361-бабы, 4 бөлімі және 3 тармағына сәйкес, Елжан Біртанов кінәлі деп танылып, 5 жылға бас бостандығы шектелсін”, – деді судья.

Ал оның орынбасары Олжас Әбішевтың төрт жылға бас бостандығы шектелді. Елжан Біртанов “санавиацияны заңсыз пайдаланды” деген айып бойынша ақталғанымен “лауазымын асыра пайдаланды” деген бап бойынша айыпты деп танылды. Екеуі сот үкімі бойынша “келтірілген” 1 млрд 350 млн теңге шығынды өтеуге міндеттелді.

Еске сала кетсек, бұрынғы министр 2020 жылдың 7 қарашасында үйқамаққа алынған болатын.

Іс барысында Елжан Біртанов өзіне тағылған айыптармен кездеспейтінін айтты. Ал прокурорлар бұрынғы министрді алты жылға бас бостандығынан айыруды сұраған.