Оралда көлік қаққан әйел қайтыс болды
Жол-көлік оқиғасы салдарынан әйел адам ашық ми жарақатын алған.
Қайғылы оқиға төртінші қарашада сағат 22:00 шамасында Брусиловский көшесінде болған. БҚО полиция департаментінің баспасөз қызметінің мәліметінше, 28 жастағы «Лада» жүргізушісі жолдың жүріс бөлігінің оң жақ шетімен ілеспе бағытта келе жатқан әйелді қағып кеткен.
Апат салдарынан 44 жастағы әйел ашық ми жарақатын алып, реанимация бөліміне жатқызылды. Кейінірек ол алған жарақаттарынан есін жимастан қайтыс болды.
Полицейлер ҚР ҚК 345-бабы бойынша сотқа дейінгі тергеу жүргізуде (ЖҚЕ бұзу). Апат кезінде жүргізуші ішімдік ішпегені анықталды.
