БҚО-да жолдардың 204 қарлы учаскелері анықталды

БҚО ТЖД бастығының орынбасары Қанат Доспаев қыс мезгілінде облыс аумағындағы жолдарды күтіп ұстау, қардан тазарту жұмыстарына дайындық барысына тоқталды.

Ол өңірде қыстағы төтенше жағдайларды жою үшін 2 031 қызметкер жұмылдырылатынын, сондай-ақ 70 жол талғамайтын техника дайындалғанын айтты.

Қыста төтенше жағдайлардың ең көп саны автомобиль жолдарында болады. Облыста ұзындығы 459 шақырым болатын 204 қарлы учаске бар. 90 учаске Республикалық маңызы бар жолдарға, 114 – облыстық жолдарға жатады. 

– Өткен қысқы кезеңде қар құрсауының 12 жағдайы тіркелгенін, тазартылған учаскеге 67 бірлік техника сүйреп шығарылғанын, 69 адам құтқарылғанын, оның ішінде 13-і бала екенін атап өткен жөн. Бүгінгі таңда Республикалық маңызы бар жолдарда 12 700 темірбетон қардан қорғау құрылыстары орнатылды. Облыстық маңызы бар жолдарда-1 200 қардан қорғайтын ағаш қалқан бар, – деді Қанат Доспаев.

Сондай-ақ жол бойында қар құрсауында қалған әрі күрделі метеожағдай кезінде жолаушыларды эвакуациялайтын 19 жылыту бекеті жұмыс жасайды .