БҚО-да 4 млн астам теңгені заңсыз аударған мекеме бухгалтері сотталды
Жәнібек аудандық сотында «Балалар-жасөспірімдер туризмі және экология орталығы» КММ бухгалтері Ақсұлу Ибраеваға қатысты үкім шықты.
Сот үкімі заңды күшіне енген жоқ.
Аталған лауазымды қызметкер ЭЦҚ пайдалану арқылы мекеме қызметкерлерінің, сондай-ақ басқа да адамдардың жеке шотына 4 млн астам теңгені заңсыз аударып жіберген.
Сот үкімімен А.Ибраеваға мүлкін тәркілемей 3 жыл 6 айға бас бостандығын шектеу жазасы кесілді. Сондай-ақ ол 3 жыл мерзімге материалдық-жауапты лауазымдарға орналасуға байланысты қызметпен айналысу құқығынан айырылды.
Сот үкімі заңды күшіне енген жоқ.
Еске сала кетейік, бұған дейін Орал қалалық сотында №17 ЖОББМ 61 жастағы бухгалтері Валентина Дзюбаға қатысты қылмыстық іс қаралған болатын. Ол сеніп тапсырылған басқа біреудің мүлкін иемденді немесе ысырап етті деп айыпталды. Әйел кінәлі деп танылып, оған екі жыл алты айға бас бостандығын шектеу жазасы тағайындалды.
Теректі ауданының балалар музыка мектебінің бас бухгалтері Бердников жалақыны және басқа төлемдерді өзінің жеке шоттарына негізсіз аударған. Мемлекетке келтірілген залал 22 миллион теңгеден асты. Бердников ұрланған ақшаны букмекерлік кеңселерде ойын-сауық пен ставкаларға жұмсаған.
