Ай сайын несие алатын қазақстандықтардың қатары 2 есе артқан

Қазақстанда ай сайын несие алатын адамдардың саны 7%-дан 12,5%-ға дейін өсті, деп хабарлайды Ulysmedia.kz.

Бұл жөнінде Zaimer қысқа мерзімді онлайн-қарыздар сервисінің талдау орталығы жүргізген зерттеу нәтижесінде белгілі болды.

«Қазақстандықтардың 12,5%-ы күнделікті шығындарға ай сайын жалақыға дейін шағын несие алады. Бір жыл бұрын бұл көрсеткіш 7% ғана болған», – делінген сервис есебінде.

Қазақстанның барлық өңірлеріндегі микроқаржы ұйымдарының (МҚҰ) 2,5 мың кәмелетке толған қарыз алушыларының пікірін зерттеген мамандардың есебіне сүйенсек, жылына екі-үш рет респонденттердің 28%-ы қысқа мерзімді қарыздар алады, ал 45%-ы жылына үш-бес рет алады.

Бұл ретте клиенттердің 10,7%-ы банктен несие (ипотека, автокредит немесе бөліп төлеу) алғысы келеді, делінген зерттеуде.

«Сізде жалақыға дейін ақша бар ма?» деген сауалға сауалнамаға қатысқандардың тек 35%-ы оң жауап берген. Сауалнамаға қатысқандардың 20%-ына 100 мың теңге және одан да көп қаржы жетпейді екен, ал 25%-ы 10-40 мың жетіңкіремейтінін айтқан.

Респонденттердің көпшілігі (61%) жинақтары жоқ және жалақыдан жалақыға дейін өмір сүретінін, 27%-ының 1-3 айға жететік жинақтары бар екенін атап өткен. Сауалнамаға қатысқандардың тек 2%-ы табыс көзінсіз бір жыл немесе одан да көп өмір сүре алатынын жеткізген.