Халықты малға теңеген әкім әлі жұмысқа шықпаған. Жауапкершіліктен қашып жүр ме?
Батыс Қазақстан облысы Бәйтерек ауданы Махамбет ауылдық округінің әкімі Бейбіт Аманғалиев 12 желтоқсаннан бері жұмысқа шықпаған. Сондықтан оны жауапкершілікке тарту мүмкін болмай отыр. «Халық қазір мал боп кетті» деген әкім қызметінде қала ма, жоқ па, ол жағы әзірге белгісіз.
ҚР Мемлекеттік қызмет істері агенттігі Батыс Қазақстан облысы бойынша департаментінің басшысы, Әдеп жөніндегі кеңес төрағасы Мұрат Байсалов Бейбіт Аманғалиевке қатысты қызметтік тергеп-тексеру жұмыстарын бастай алмай отырғандарын айтады.
– Себебі ол кісі әлі жұмысқа шыққан жоқ. Денсаулығына байланысты (больничный) демалыста. Ал демалыста болған адамның үстінен тергеп-тексеру жұмыстарын жүргізуге, жауапкершілікке тартуға заң рұқсат бермейді. Жұмысқа шыққан бойда біз қызметтік тергеп-тексеруді жалғастырамыз,- деді Мұрат Байсалов.
Айта кетейік, бұл жағдай біздің назарымызда. Алдағы уақытта Бейбіт Аманғалиев қандай жауапкершілікке тартылғанын жазатын боламыз.
Есенжол ЕЛЕКЕНОВ
