БҚО бюджетіне 33 млн теңге қайтарылған

Батыс Қазақстан облысының бюджетіне осы жылы 33 млн теңге қайтарылған. Бұл қаржының 12 млн теңгеден астамы әкімшілік айыппұлдар. Бұл жөнінде «Әділдік жол» республикалық қоғамдық бірлестігінің Батыс Қазақстан облысындағы өкілі Бауыржан Ахметжан жылды қорытындылау брифингінде айтты.

Ол осы жылы 1000-нан астам мемлекеттік сатып алу шарттарын тексергендерін, соның біразында заңсыз әрекеттер анықталғанын айтады.

— Заңсыз әрекеттер үшін тиісті органдарға дер кезінде арыз-шағым жаздық. Соның нәтижесінде біз айына облыстық бюджетке 2 млн 700 мың теңге қаржыны қайтартқызып отырдық,-дейді Бауыржан Ахметжан.

Оның сөзінше, мемлекеттік сатып алу туралы заңын бұзған 43 мемлекеттік қызметкерге ҚР Әкімшілік құқық бұзушылық туралы кодексінің 207-бабы бойынша іс қаралған.

— Олар бюджетке 7 965 230 теңге қаржыны қайтарды. Бұдан бөлек, заңсыз кәсіппен айналысқан бес мемлекеттік қызметкерді анықтадық. Бұларға да 154-бап бойынша іс қозғалып, 2 144 100 теңге қаржыны қайтартқыздық. Басқа да заң бұзушылықтар жетерлік,-деді Бауыржан Ахметжан.

Есенжол ЕЛЕКЕНОВ