Оралдық кәсіпкерді қатыгездікпен өлтірген екеудің ісі сотқа жолданды
Оралда кісі қолынан қаза тапқан кәсіпкерге қатысты іс бес айдан соң сотқа жіберілді.
Кәсіпкер Еркін Мұқанғалиев өткен жылы 6 тамызда көз жұмды. Оның денесі көптеген пышақ жарақатымен П. Атоян атындағы стадионның тұрағынан табылған болатын.
Кәсіпкер мен тағы екі адамның кафеде отырғаны бейнебақылау камераларына түсіп қалған. Олардың арасында жанжал болып, еркектердің бірі Еркін Мұқанғалиевке пышақ жұмсаған. Кәсіпкер қылмыскерлерден қашуға тырысады, алайда олар Мұханғалиевті қуып жеткен.
Полиция екі күдіктіге – 31 жастағы Руслан Қожантаев пен 21 жастағы Тұрлан Амангелдіге іздеу жариялады. Алдын ала мәлімет боынша қайғылы оқиғаға кәсіпкердің жұмысшы ақысын бермеуі себеп болуы мүмкін.
Күдіктілер 8 тамызда «Көктем» саяжайында ұсталды. Олар полицияға еш қарсылық көрсетпестен берілген.
Қылмысты іс ішкі істер министрлігінің бақылауында болған. Күдіктілерге 20 жылдан бастап өмір бойына бас бостандығынан айыруға дейін жаза кесілуі мүмкін.
Қылмыстық іс бес ай тергеліп, 30 желтоқсанда сотқа берілді. Ол судья Шара Зайнуллинаның төрағалығымен мамандандырылған ауданаралық қылмыстық сотта қаралады. Соттағы алдын ала тыңдау күні әлі белгіленген жоқ.
