Тәрбиешілерден ақша талап еткен балабақша меңгерушісі қызметінен кетті

Батыс Қазақстан облысы Казталов ауданы Жалпақтал ауылындағы «Балдәурен» балабақшасының меңгерушісі Манзия Халимуллина қызметінен кетті. Бұл туралы Казталов ауданы білім бөлімінің басшысы Самал Джангереева айтты.

Оның сөзінше, Манзия Халимуллина 19 қаңтар күні өз еркімен жұмыстан кетуге өтініш берген.

– Өзімен жасалған келісім шартты тоқтату туралы өтініш жазды. 20 қаңтар күні Еңбек кодексінің 49-бабының, 5-тармағы бойынша жұмыстан босатылды,-дейді Самал Джангереева.

Балабақша тәрбиешісі Дана Дарвинова Манзия Халимуллинаполицияға шағым түсіргенін айтады.

-16 қаңтар күні таңертеңгісін біздің үстімізден шағым түсірген. Сол күні кеште бізді полицияға шақырды. Полиция қызметкері «Журналисті кім шақыртты? Не үшін шақырдыңыздар?» деп сұрады. Біз Манзия Халимуллинаға қатысты мәселенің бар екенін, қолымызда бар барлық фактілерді көрсету үшін шақырғанымызды айттық. Содан кейін полиция шақыртқан жоқ. Енді Манзия Халимуллина сотқа берем деп айтатын көрінеді,-дейді Дана Дарвинова.

Айта кетейік, осыған дейін Манзия Халимуллинаның қызметін асыра пайдаланып, балабақша қызметкерлерінен ақша жинағанын жазған болатынбыз.

Есенжол Елекенов