Журналист Лұқпан Ахмедяров заң талаптарына сай келеді деп танылды

Бүгін, 6 ақпан күні Батыс Қазақстан облыстық сайлау комиссиясы мәжіліс депутаттығына үміткер журналист Лұқпан Ахмедяровтың құжаттарын қарап, заң талаптарына сай келеді деп шешім шығарды.

Комиссия отырысында төраға Ғайса Қапақов Лұқпан Ахмедяров заң талаптарына сай келе ме, жоқ па, қарау үшін құзырлы органдарға сұрау салғандарын айтты.

— Көші-қон басқармасының берген мәліметінде Лұқпан Ахмедяров 10 жыл тіркеуде болған. Яғни ешқандай заң бұзушылық жоқ. Соттылығы да жоқ,-деген Ғайса Қапақов Ахмедяровты сәйкес деп тану үшін дауысқа салды. Комиссия мүшелері оны қолдады.

Ғайса Қапақов Лұқпан Ахмедяровқа тіркелу үшін 18 ақпанға дейін 1 млн 50 мың теңге жарна төлеу қажет екенін және декларация тапсыру керектігін айтып, қазір үгіт-насихат жұмыстарын жүргізуге болмайтынын түсіндірді.

— Біз сізді 18 ақпан кешкі алтыға дейін тіркеуіміз керек. Соған дейін барлық материалдарды тапсыруыңыз қажет. Сосын, сенімді өкілдерін де тіркейсіз. Оған дейін үгіт-насихат жұмысын жүргізуге болмайды, осы айдың 18-нен бастап рұқсат етіледі,-деді Ғайса Қапақов.

Комиссия отырысынан соң «Орал апталығы» тілшісіне пікір білдірген журналист Лұқпан Ахмедяров облыстық сайлау комиссиясы «заң талаптарына сай келмейді» деп тана ма деген күдік-күмән болғанын айтты.

— Шынымды айтсам, таңқалып тұрмын. Әйтеуір, бір себеп тауып, «сәйкес келмейді» деп шешім шығарама деп ойлағым,-дейді Лұқпан Ахмедяров.

Ол мәжіліс депутаттығына не себепті үміткер болғанын үгіт-насихат жұмысына рұқсат етілгеннен кейін ғана ашып айтамын деді.

Бұдан бөлек, сайлау комиссиясының мүшелері мәжіліске тағы бір үміткер Нұрлан Кариннің құжаттарын қарады. Ғайса Қапақов оның үш жыл тіркеуде болмағанын алға тартып, сәйкес келмейді деп тапты.

Батыс Қазақстан облыстық сайлау комиссиясының 5 ақпан күні кешкісін Facebook парақшасына жариялаған мәлімет те – мәжіліске – 10, облыстық мәслихатқа – 43, қалалық мәслихатқа – 69, аудандық мәслихатқа – 403 үміткер тіркелгені жазылған.