БҚО-да балаларға қол көтерген бапкерге іс қозғалды

Батыс Қазақстан облысы полиция департаментінің ресми өкілі Болатбек Нұрғожин жаттықтырушы Қайсар Құсайновтың үстінен Әкімшілік құқықбұзушылық кодексі 73-2-бабы 1-бөлігі (ұрып-соғу) бойынша іс қозғалғанын айтты.

-Бұл бап бойынша айыпты деп танылған адам он айлық есептік көрсеткіш мөлшерінде айыппұл салуға не он тәулікке дейінгі мерзімге әкімшілік қамаққа алуға жазаланады. Балаға қол көтерген Шыңғырлау ауылындағы дене шынықтыру-сауықтыру кешенінің 1974 жылғы бапкері анықталды. Біз БҚО дене шынықтыру және спорт басқармасына аталған бапкердің тәртібін қарау және тәртіптік шара қолдану жөнінде ұсыным жолдадық, – дейді Болатбек Нұрғожин.

Оның сөзіне қарағанда, балаға самай тұсы көгерген деген диагноз қойылған. Айта кетейік, осыған дейін Шыңғырлау ауданы, Шыңғырлау ауылында балалар және жасөспірімдер спорт мектебінің самбо күресінің бапкері Қайсар Құсайновтың екі баланы соққаны жөнінде жазған болатынбыз.

ОҚИ ОТЫРЫҢЫЗ: БҚО-да жаттықтырушы балаларды не үшін ұрды? (Видео)