Батыс Қазақстанда аулалар мен көшелерді еріген қар суы басып қалды
Батыс Қазақстан облысында күн жылынып, қардың тез еруіне байланысты үйлердің аулалары мен көшелерді қызыл су басып қалды, деп хабарлайды төтенше жағдайлар министрлігінің баспасөз қызметі.
«2023 жылғы 28 ақпан 16.00-ден 23.00-ге дейін +2 температура режимінде қардың жылдам еруі салдарынан Орал қаласы мен Бөрлі ауданындағы Ақсай қаласы орталығының көшелері мен тұрғын үй аулаларында еріген қар суы жиналды», – деп хабарлады БҚО ТЖД баспасөз қызметі.
Төтенше жағдайлар департаменті және жергілікті атқарушы органдардың күшімен еріген қар суын бұру және сору жұмыстары жүргізілді. Көшелер мен аула аумақтарынан барлығы 933 текше метр су сорылып, 5100 текше метр қар шығарылды.
Барлық жедел ақпаратты облыстың ТЖД жедел су тасқынына қарсы штабы және Орал қаласы мен аудандардың әкімдіктері өңдейді. Су тасқыны кезеңі бақылауға алынған.
Бұған дейін төтенше жағдайлар министрі Юрий Ильин биыл жеті жүз мыңнан астам қазақстандық су басқан аймақта қалуы мүмкін екенін мәлімдеген болатын.
