БҚО-да есірткіге еліткен Hyundai жүргізушісі жаяу жүргіншіні қағып, мерт қылды
БҚО-да мас жүргізуші жаяу жүргіншіні қағып кетті. Ер адам оқиға орнында жан тапсырды.
Қайғылы оқиға 8 сәуірде сағат 23:18 уақыт шамасында Атырау-Орал тас жолындағы Круглоозерное ауылының маңында орын алды.
«33 жастағы Hyundai Sonata автокөлігінің жүргізушісі жол қауіпсіздігін қамтамасыз етпей, жолдың белгіленбеген жерінен өткен 33 жастағы ер адамды қағып кетті. Жол апаты кезінде жүргізушінің каннабиоидтарды (марихуана) қолданудан туындаған есірткіге мас күйінде болғаны анықталды», делінген полиция хабарламасында.
ҚР ҚК 345-бабы 3-бөлігі бойынша сотқа дейінгі тергеу жүргізіліп жатқаны да нақтыланады.
БҚО денсаулық сақтау басқармасы баспасөз қызметі оқиғаны растап, ер адамның оқиға орнында қайтыс болғанын жеткізді.
