Қазақстанда мемлекеттік шекара арқылы жүк көлігін өткізу ақысы белгіленеді
Мемлекеттік кірістер комитеті «Қазақстан Республикасының Мемлекеттік шекарасы арқылы автомобиль көлік құралдарын, жүктер мен тауарларды өткізу, сондай-ақ олардың электрондық кезек бойынша өтуі үшін төлемдердің мөлшерін айқындау туралы» бұйрық дайындады.
Мәселен, ҚР Мемлекеттік шекарасы арқылы жүк автомобильдерін, оның ішінде тіркемелері бар жүк көліктерін және сүйретпелерді өткізу үшін 3 АЕК (10 350 теңге) мөлшерінде ақы белгілеу ұсынылады.
Бұл ретте төлемді есептеу үшін тиісті жылға арналған «Республикалық бюджет туралы» ҚР Заңында белгіленген айлық есептік көрсеткіш қолданылатын болады.
Бұйрық 2024 жылғы 1 қаңтардан бастап қолданысқа енгізіледі деп жоспарлануда.
Құжат 25 сәуірге дейін ашық талқылау үшін Ашық НҚА сайтында орналастырылған.
Дереккөз: zakon.kz
