БҚО-да қызылшаға қарсы 700-ден астам бала егілген
БҚО санитариялық-эпидемиологиялық бақылау департаменті басшысының орынбасары Нұрлыбек Мұстаевтың өңірлік коммуникациялар қызметі алаңында өткен брифингте мәлім еткеніндей, 23-30 сәуір аралығында Еуропалық иммундау апталығы өтіп жатыр.
Оның сөзіне қарағанда, осыған орай Батыс Қазақстан облысында апталық аясында департамент БҚО денсаулық сақтау басқармасымен бірлескен жұмыс тобын құрып, жоспарға сәйкес іс-шараларды атқарып жатыр.
Апталық басталғаннан бері үш күн ішінде өңірде ата-аналарының келісімімен 700-ден астам бала қызылшаға қарсы екпе алды.
Қазіргі таңда көршілес облыстарда, Астана мен Алматы қалаларында, Ресей өңірлерінде қызылшаның өршіп отырғаны мәлім.
Сондықтан балалардың уақтылы екпе алуының маңызы зор.
Нұрлыбек Ермекұлының айтуынша, ДСҰ ұсынысы бойынша тұрғындардың кем дегенде 95 пайызы профилактикалық екпе алуы қажет. Осы ұсынба департамент тарапынан қадағаланып отырады.
Оның мәлімдеуінше, соңғы он жылда 1600-ден астам ата-ана балаларына екпе салдырудан бас тартты.
Мұның себептері – әлеуметтік желіде жарияланып жатқан екпеге қарсы насихат, медициналық қарама-қайшылық және діни негіз бойынша бас тарту.
«Жыл басынан бері Батыс Қазақстан облысында қызылша болуы мүмкін 3 дерек тіркеліп, соның біреуі зертханалық расталды. Науқаспен байланыста болған адамдар медициналық бақылауға алынды. Мектепке дейінгі білім беру ұйымдарында эпидемиологиялық жағдайдың нашарлауын болдырмау үшін санитарлық-эпидемиологиялық іс-шараларды жүргізу және сақтық шараларын сақтау қажет. Қызылша ауыр жағдайда өтсе, бронхопневмонияға, лимфа түйіндерінің қабынуына, ларингитке, энцефалитке әкелуі мүмкін. Бала қызылшаға қарсы 1 және 6 жасында егілуі керек. Тұрғындарға айтарымыз, егер балаңыз қандай да бір себептермен қызылшаға қарсы екпе алмаған болса, жергілікті емханада вакцинациядан өту ұсынылады. Екпе алу – тегін», -деді Н.Мұстаев.
ТАҚЫРЫП БОЙЫНША ОҚЫҢЫЗ: Қазақстанда қызылша ауруы асқынып жатыр: Денсаулық сақтау министрлігі алаңдаулы
Бұдан былай балабақшалар екпе алмаған балаларды қабылдамайды
