Жұмыстан айырылу төлеміне өтінішті телефон қосымшасы арқылы беруге болады
Бұл төлемді азаматтар 1 айдан 6 айға дейін ала алады.
Екінші деңгейлі банктердің қосымшасы арқылы жұмысынан айырылу бойынша төлемге өтінім беруге болады, деп хабарлайды еңбек және халықты әлеуметтік қорғау министрлігінің баспасөз қызметі.
Бұл төлемді азаматтар 1 айдан 6 айға дейін ала алады. Бұған дейін аталған өтінішті Enbek.kz электрондық еңбек биржасы, халыққа қызмет көрсету орталығы, «Электронды үкімет» порталы арқылы беретін. Енді оны Halyk мобильді қосымшасының «Мемлекеттік қызметтер» бөлімі арқылы бере алады.
ҚР Еңбек және халықты әлеуметтік қорғау министрлігі екінші деңгейдегі банктермен (бұдан әрі – ЕДБ) азаматтар үшін мемлекеттік қызметтердің қолжетімділігін арттыру бойынша бірлескен жұмысты жалғастыруда.
«Азаматтарға әлеуметтік-еңбек саласының қызметтеріне қол жеткізуді қамтамасыз ету бойынша жұмыс әр түрлі платформаларда тұрақты жүргізілуде. ЕДБ арқылы біздің алғашқы қызметтеріміз 2021 жылы қол жетімді болды. Олар «Бала тууға және бала күтіміне байланысты жәрдемақы тағайындау» және «Бала бір жарым жасқа толғаннан кейін оның күтіміне байланысты табысынан айырылған жағдайда әлеуметтік төлем тағайындау». 2022 жылы бұл тізім тағы 4 қызметке кеңейді. Жұмысынан айырылу бойынша өтінім беру – биылғы жылы іске асырылған екінші қызмет», – деді ҚР Еңбек және халықты әлеуметтік қорғау вице-министрі Ербол Оспанов.
Сервисті ҚР Еңбек және халықты әлеуметтік қорғау министрлігі, ҚР Цифрлық даму, инновациялар және аэроғарыш өнеркәсібі министрлігі және «Қазақстан Халық банкі» АҚ іске асырды.
