Оралда түнде базар өртенді

Батыс Қазақстан облысы Орал қаласында базар өртенді, деп хабарлайды облыстық төтенше жағдайлар департаментінің баспасөз қызметі.

Өрт сөндірушілерге түнгі сағат 23:00 шамасында хабарлама түскен.

«Сағат 22.53-те «Бәйтерек» жабық сауда орны жанып жатқаны жөнінде хабарлама түсті. Оқиға орнында 48 жеке құрам және 12 бірлік техника, полиция департаментінің 11 қызметкері, 3 бірлік техника жіберілді. Батыс Қазақстан аймақтық энергетика компаниясынан 2 техника мен 5 адам қосымша жұмылдырылды», – дейді ведомстводағылар.

Тілсіз жау сағат 00:09 оқшауланып, 00:37 толық жойылды. Өрттің салдарынан шамамен 80 шаршы метр алаң жанып кеткен. Зардап шеккендер жоқ.

БҚО ТЖД өрт бақылау басқармасының бастығы Мереке Жұмағалиев өткен жылы алты сауда нысанында өрт шыққанын хабарлады. Жыл басынан бері-тоғыз жағдай. Бес жағдайда әкімшілік ғимараттар, төрт жағдайда өндірістік нысандар өртенді.

— Негізінен өрттің себебі электр сымдарының немесе электр жабдықтарының тұйықталуы болып табылады. Қазір жаз, көптеген техникалар қосылады, желіге салмақ түседі. Жабдық жаңа болғанымен, сымдар ескі, нәтижесінде өрт шығады, – деп түсіндірді Жұмағалиев.