«Сүйегі көрініп қалған». Оралда ит 13 жастағы қыздың аяғын оңдырмай тістеп алған

Жануар кішкентай қызды басқа балалар күшіктерді ұстап тұрған кезде тістеп алған.

Қыздың анасының айтуынша, оқиға 31 мамырда болған. Қабаған ит көпқабатты үйдің ауласында бірнеше жылдан бері мекендейтін көрінеді.

«Ит қызымның аяғын тістеп қана қоймай, етін жұлып алған. Тіпті сүйегі көрініп қалған. Қазір қызымның жағдайы жақсарды, жарасы біртіндеп жазылып келеді. Бірақ аяғы бұрыңғыдай болуы үшін болашақта эстетикалық ота жасалу керек», – дейді жәбірленушінің анасы.

Аулада ойнап жүрген балалар иттің күшіктерімен ойнамақ болған. Баласын қызғанған ит қыздың аяғынан қауып алған. Ал аула тұрғындары болса, қаңғыбас иттен мезі болғандарын айтады.

«Біз таңертең келсек те, күні бойы аңдысақ та таппаймыз. Жануар ақылды, бәрін сезеді, ұстатпай қашып кетеді. Жануарды ұстаған кезде заң бойынша 10 күн карантинге жібереміз, содан кейін оны қайтадан тіршілік ету ортасына жібереміз. Тек комиссияның шешімімен ғана оны ұйықтата аламыз, онда да жануар агрессивті болса», — дейді Орал қалалық ветеринарлық станциясының директоры Мадияр Ахметов.

Биыл Оралда мыңнан астам ит ұсталып, зарарсыздандырылған.

Ветеринарлық қызметтегілер итті осымен 5 күннен бері таба алмағандарын айтты. Полицейлер ит иесіз болғандықтан, ешкімді жауапқа тарту мүмкін емес екенін жеткізді.