Қарт Каспийдің хәлі мүшкіл – министрлік түсініктеме берді
Экология министрі Зульфия Сүлейменова Каспий теңізінің таяздап кеткеніне әсер еткен бірнеше факторды атады.
«Біріншіден, Каспий теңізіне құятын өзендер ағысы төмендеген. Теңіз – жабық су айдыны. Екінші мәселе – сол өзендердің гидрологиялық режимдеріне әсер ететін климаттың өзгеруі», – деп түсіндірді Сүлейменова.
Соңғы бірнеше жылда су азайып бара жатыр, дейді министр.
«Су азайған сайын теңізге құятын су көлемі де азаяды. Сонымен қатар Каспий теңізінің қазақстандық аумағы ең таяз аумақ. Сондықтан біз климаттың өзгеруінің салдарын сыртқы экзогендік фактор ретінде көріп отырмыз», – деді экология министрлігінің басшысы.
Министр теңіздегі көңілсіз жайтты Каспийді жағалай орналасқан шетелдік әріптестерімен талқылап жатқанын айтады.
«Біз бұл мәселені Каспий маңындағы әріптестерімізбен бірге көтеріп жатырмыз. Нью-Йоркте Әзербайжанның экология министрімен кездестім. Сол жерде біз бұл мәселені де талқыладық. Ресейдің табиғи ресурстар және экология министрімен де біз бұл мәселені көтердік. Өйткені бұл жерде Жайық суының тартылуы ғана емес, Еділ өзенінің де мәселесі тұр», – деді Сүлейменова.
Министрдің айтуынша, бұл проблеманы ауқымды түрде шешпесе тек Қазақстан емес, Каспий теңізі жағалауындағы өзге де мемлекеттер үшін қауіп төнеді.
Осының алдында Ақтауда қарт Каспийдің тартылуына байланысты табиғи сипаттағы төтенше жағдай режимі жарияланды.
