Нұржан Әлтаев не үшін ұсталғаны белгілі болды
Экс-вице-министр Нұржан Әлтаев аса ауыр жемқорлық қылмыс жасады деген күдікпен ұсталды, деп хабарлайды сыбайлас жемқорлыққа қарсы іс-қимыл агенттігі.
«Нұржан Әлтаев еңбек және әлеуметтік қорғау вице-министрі, кейіннен мәжіліс депутаты ретінде «Атамекен» ұлттық кәсіпкерлер палатасының басқарма төрағасы Абылай Мырзахметовтен аса ірі мөлшерде жүйелі түрде пара алды деген күдікке ілінді», – дейді Антикор.
Ақпаратқа сәйкес, 2018-2020 жылдар аралығында Әлтаев жауапты мемлекеттік лауазымдарда жүріп, Абылай Мырзахметовтың мүддесі үшін әрекет еткен.
Мырзахметовтың ұйымына мемлекеттік тапсырыстарды алуға көмектесіп, «қамқоршылық» көрсеткен.
Нұржан Әлтаев Астана қаласы полиция департаментінің уақытша ұстау изоляторына қамалды. Тергеу жалғасып жатыр.
ҚР ҚПК 201-бабына сәйкес тергеу мүддесі үшін өзге ақпарат жария етуге жатпайды.
«Конституцияның 77-бабы 3-тармағының 1-тармақшасына және Қылмыстық-процестік кодексінің 19-бабы 1-бөлігіне сәйкес, қылмыстық құқық бұзушылық жасаудағы кінәсі соттың заңды күшіне енген үкімімен белгіленгенге дейін әрбір адам кінәсіз деп есептеледі», деп жазды агенттіктен.
