Тамара Дүйсенова премьер-министрдің орынбасары болды
Тамара Дүйсенова премьер-министрдің орынбасары – еңбек және халықты әлеуметтік қорғау министрі болып тағайындалды, – деп хабарлайды Ақорда сайты.
Мәжіліс ҚР премьер-министрінің орынбасары лауазымына Тамара Дүйсенованың кандидатурасын мақұлдады.
«Бүгін Мәжілістің Әлеуметтік-мәдени даму комитеті отырысында Қазақстан Республикасы Премьер-Министрінің орынбасары қызметіне тағайындау үшін Тамара Босымбекқызы Дүйсенованың кандидатурасы келісілді» делінген Мәжіліс таратқан хабарламада.
Мәжілісте мәселе «Қазақстан Республикасының Парламенті және оның депутаттарының мәртебесі туралы» Қазақстан Республикасы Конституциялық заңының 22-1-бабына сәйкес қаралды.
Отырыс қорытындысы бойынша ұсынылған Дүйсенова Тамара Босымбекқызының кандидатурасын ҚР премьер-министрінің орынбасары лауазымына тағайындауға ұсыну мүмкіндігі туралы Комитеттің қорытындысы қабылданды.
Президент Қасым-Жомарт Тоқаев Тамара Дүйсенованы премьер-министрдің орынбасары қызметіне тағайындау туралы жарлыққа қол қойды, ол Еңбек министрі қызметін сақтап қалады.
«Мемлекет басшысының Жарлығымен Тамара Босымбекқызы Дүйсенова Қазақстан Республикасы Премьер-Министрінің орынбасары – Еңбек және халықты әлеуметтік қорғау министрі болып тағайындалды» делінген хабарламада.
Еске салайық, бұған дейін Алтай Көлгінов премьер-министрдің орынбасары қызметінен босатылған болатын.
