Оралдық оқушының зорланғаны туралы істе бесінші күдікті пайда болды
Оралда 13 жастағы оқушы қыз зорланған еді. Соған қатысты жаңа мәліметтер белгілі болды. Дәлірек тағы бір бесінші күдікті пайда болды.
«Оқиға 12 маусымда, яғни 9-сынып оқушылары емтихан тапсыратын күні болған. 16 және 17 жастағы жасөспірімдер 13 жастағы оқушы қызды зорлады деген күдікке ілінді. Тергеушілердің мәліметінше, олар қызды пәтерге алаяқтықпен кіргізген. Полиция ақпаратына сәйкес, оқиға жалдамалы пәтерде болған. Қорғансыз қызды жәбірлегендер – 9 және 10-сынып оқушылары мен бір студент. Қыз бала жасөспірімдердің біреуін ғана танитынын айтты, соның сөзіне еріп пәтерге барған. Сол кезде ішімдікке масайған жігіттер оны зорлапты. Жәбірленушінің ішімдік ішпегенін анықтадық. Күдіктілер бұған дейін ұрлық пен тонау секілді қылмыс жасағаны үшін істі болған. Біреуі тіпті үш рет сотталған»,- деп мәлімдеді Батыс Қазақстан облыстық полиция департаменті.
БҚО Полиция департаментінің баспасөз қызметінен бүгін мәлім еткеніндей, күдікке тағы бір жас жігіт ілікті.
«Бұл күдікті кәмелетке толған. Алдын ала мәлімет бойынша ол қылмыс жасалған пәтерді жалға алған. Бесінші күдікті де уақытша ұстау изоляторына тоғытылып, сот санкциясымен екі айға қамалды. Тергеу жорамалы бойынша қызды пәтерге алдап шақырған. Күдіктілердің кінәсі дәлелденсе, олар 20 жылға дейін бас бостандықтарынан айырылуы мүмкін», – деп хабарлады ведомстводан.
Қазіргі кезде тергеу амалдары жалғасып жатыр.
