Батыс Қазақстанда жол апатынан тағы екі адам мерт болды
Бұл – бір күнде болған екінші қайғылы оқиға.
БҚО полиция департаментінің баспасөз қызметінен мәлім еткеніндей, оқиға 7 шілде күні Бөрлі ауданы аумағында болды.
«Сағат 18.20-да Бөрлі-Ақсай-Жымпиты күре жолының 10-шақырымында 1983 жылғы жүргізуші «ВАЗ-21114» автокөлігімен келе жатып, қарсы бетке шығып кеткен. Содан 1981 жылғы жүргізуші айдап келе жатқан «ВАЗ-21120» автокөлігімен соқтығысуға жол берген. Жол апаты салдарынан екі жүргізуші оқиға орнында көз жұмды. Үш жолаушы Ақсай қаласындағы орталық аудандық аурухананың хирургиялық бөлімшесіне жеткізілді. Қазіргі кезде оқиғаның мән-жайы анықталып жатыр», деп хабарлады ведомстводан.
БҚО денсаулық сақтау басқармасы баспасөз қызметінің нақтылауынша, аталған ауруханада жатқан 1989 жылғы ер, 1984 жылғы әйел адамның және 2013 жылғы баланың жағдайы орташа ауыр.
Бұл – бір күнде болған екінші қайғылы оқиға.
Еске сала кетейік, бұдан бұрын БҚО-да жол апатынан 2 адамның қаза тауып, бесеуінің ауруханаға жеткізілгенін жазған болатынбыз.
Соның ішінде 7 айлық сәби жансақтау бөлімінде жатыр.
Дереккөз: Іnform.kz
