Батыс Қазақстанда бірнеше дала өрті сөндірілді

Өңірімізде 100 гектардан аса жер өртке оранды.

Батыс Қазақстан облысында бір күнде бірнеше дала өрті сөндірілді.

БҚО ТЖ департаментінің баспасөз қызметінен мәлім еткендей, 9 шілде күні сағат 15.17-де Бөрлі ауданы Ақсу ауылынан 6 шақырым жерде Суықбұлақ арнасы маңында құрғақ шөп өртенді.

«46 гектар аумақты қамтыған тілсіз жауды ауыздықтауға өрт сөндірушілермен бірге орман шаруашылығы мекемесі, ерікті өрт сөндіру құрылымдарынан барлығы 38 адам, 8 техника жұмылдырылды. Өрт 21.30-да оқшауланып, 22.41-де сөндірілді. Сондай-ақ бүгін сағат 13.26-да Ақжайық ауданы Қарауылтөбе ауылдық округі «Аяқ» су қоймасы маңында 25 гектар құрғақ шөп отқа оранды. Бұл өрт те 36 адам, 6 техниканың қатысуымен сағат 20.22-де жойылды», — деп хабарлады ведомстводан.

Сондай-ақ, дала өрті 9 шілде күні Теректі ауданы Шалқар ауылдық округінде болды.

«Сағат 11.03-де Сарыөмір ауылынан 10 шақырым жерде шамамен 10 гектардай аумақта құрғақ шөп отқа оранды. Оқиға орнында ерікті өрт сөндіру құрылымы жұмыс жасауда. Сондай-ақ өрт сөндірушілер де барды. Сағат 12.20-да күш-құралдарды үйлестіру үшін ТЖ департаментінің жедел штабы құрылды», деп хабарлады ведомстводан.

БҚО ТЖ департаменті мәліметі бойынша Теректі ауданы Сарыөмір ауылынан 10 шақырым қашықтықта екі жерде (Егінсай – 45 га, Кірпі – 40 га) бүгін шыққан өрт сағат 16.20-да толықтай ауыздықталды.