Оралда апатты үйлер азайып келеді
Орал қаласында 8 апатты үй сүріліп, орнына жаңадан көп пәтерлі 4 тұрғын үй салынып жатыр.
8 жыл ішінде 28 апаттық және тозығы жеткен үйлер бұзылып, олардың орнына 14 көпқабатты үй салынды. Жергілікті билік өкілдерінің айтуынша, тұрғын үй қорын жаңартуға бағытталған жоба 2025 жылға дейін есептелген. Мемлекет тарапынан инвесторларға инженерлік коммуникациялар жүргізілген жер учаскелерін ресімдеу бойынша қолдау көрсетіледі. Облыс орталығында барлығы 56 ғимарат бұзуға жатады.
Нұртілеу Шайдағалиев, Орал қаласы ТКШ бөлімінің сектор меңгерушісі:
— Жыл соңына дейін жөндеу бағдарламасы бойынша 3 үй пайдалануға беріледі. 40 отбасын жаңа тұрғын үймен қамтамасыз етеміз. Бағдарлама ескі тұрғын үй мәселесін шешуге мүмкіндік береді. Сонымен қатар, облыс орталығының сыртқы келбеті жыл сайын жақсарып келеді.
Яашар Зейналов, құрылыс компаниясының өкілі:
— Тозығы жеткен және апатты тұрғын үйлерді жаңарту бағдарламасы бойынша құрылыс жүргізіп жатырмыз. Мұнда ескі үй 2 қабатты, апатты деп танылды. Біз оны жөндеуге алдық, қазір оның орнында 9 қабатты үй салып жатырмыз. Мұнда 16 тұрғын болды. Құрылыс кезінде барлығы басқа жерге қоныстанды.
Дереккөз: 24.kz
ОҚИ ОТЫРЫҢЫЗ: Орал тұрғын үй қорын жаңарту қалай жүріп жатыр
