Қазақстанда 1,3 млн әйелдің мүлдем зейнетақы аударымдары жоқ
Еңбек және халықты әлеуметтік қорғау министрлігі еліміздегі әйелдердің жұмыспен қамтылу статистикасын жариялады.
Ведомство мәліметінше, бүгінде елімізде жұмыс күші құрамында 4,6 млн әйел кісі еңбек етсе, оның 4,4 млн-ы (95%) экономиканың түрлі салаларында жұмыс істейді. Ал жұмыспен қамтылған әйелдердің 64%-ы қалаларда тұрады. Электрондық еңбек шарттары бойынша талдау көрсеткендей, басшылық қызметтегі әйелдердің үлесі 41%-ды құрап отыр.
«Қазіргі уақытта Отбасының цифрлық картасының мүмкіндіктерін кеңінен қолданудамыз, оның деректері бойынша 2,8 млн әйел ресми түрде жұмыс істейді. Олар үшін міндетті зейнетақы жарналары аударылуда. Сонымен қатар, 1 млн-нан астам әйел ауылдық жерлерде тұрады. Ақпараттық технологиялар саласында 46,5 мыңға жуық әйел азаматы жұмыс істейді, оның 39 мыңы – қала тұрғындары. Олардың компаниялардағы қызметтеріне қатысты: 11% – басшылар; 30% – мамандар; 59% – техниктер мен көмекші персонал», – деді министр Светлана Жақыпова.
Сондай-ақ, жұмыспен қамтылмаған, зейнетақы аударымдары жоқ, оқу орнында оқып жатпаған және декреттік демалысқа шықпаған әйелдер бойынша талдау жұмыстары жүргізілген.
«Осы санаттағы 1 млн 295 мың әйелді анықтадық. Біз өңірлердегі жағдайдан хабардармыз және ОЦК мүмкіндіктерін пайдалана отырып, қажетті ақпаратты SMS арқылы жолдап, нақты қолдау шараларын ұсынамыз. Бұл жұмыс жүзеге асырылуда. Оның нәтижесінде 8,2 мың қазақстандық жастарды жұмысқа орналастырдық», – деді ведомство басшысы.
«1 қазандағы жағдай бойынша 3415 әйел 1,3 млн теңге көлемінде қайтарымсыз грант алды. Олардың 68%-ы тауарлар мен қызметтерді өндіруге қажетті технологиялық жабдықтарды және керек-жарақтарды сатып алды, ал 29%-ы төрт түлік мал сатып алып, мал шаруашылығымен айналысуда. 35 жасқа дейінгі 2206 әйел жылдық мөлшерлемесі 2,5%-дық жеңілдетілген микрокредит алды.
Бұл бағыттағы жұмыстар жалғасуда. 2024 жылы оқыту бағдарламасын өзектендіруді жоспарлап отырмыз және оның аясында әйелдер кәсіпкерлігі модулін пысықтайтын боламыз», – деп түйіндеді Светлана Жақыпова.
