SpaceX еліміздің шалғай ауылдарын спутниктік интернетпен қамтамасыз етеді
Мемлекет басшысы Қасым-Жомарт Тоқаев SpaceX компаниясының Starlink мәселелері жөніндегі вице-президенті Лорен Дрейермен кездесті.

Қасым-Жомарт Тоқаев Лорен Дрейермен кездесуде SpaceX ғарыш телекоммуникациясы саласындағы әлемдік көшбасшы компаниялардың бірі екенін атап өтті, деп жазды Ақорданың ресми сайты.
Президенттің айтуынша, SpaceX компаниясының әзірлемелері жоғары технологиялардың дамуын ынталандыру үшін сұранысқа ие стратегиялық құралға айналды. Қазақстан SpaceX корпорациясын өзара тиімді ынтымақтастық орнату үшін сенімді серіктес ретінде қарастырады.
Өз кезегінде Лорен Дрейер StarLink компаниясының Қазақстандағы қызметін кеңейту жөніндегі жоспары, атап айтқанда, еліміздің шалғай ауылдарын спутниктік интернетпен қамтамасыз ету жобасы туралы айтты.
Starlink-SpaceX компаниясының спутниктік байланыс жүйесі. Оған антенна мен маршрутизатор арқылы қосылуға болады. SpaceX Жер орбитасында орналасқан спутниктерді ұшырады. Ашық деректерге сәйкес, ең арзан тариф — айына 110 доллар (52 мың теңгеден астам).