БҚО-да жасөспірімдер жасаған қылмыс саны 26,1% — ға өскен

Ағымдағы жылдың қорытындысы бойынша кәмелетке толмағандар 87 қылмыс жасады, оның 14 – і білім беру мекемелерінің қабырғасында. БҚО полиция департаментінің бастығы Арман Оразалиев Орал қаласының орта арнаулы және жалпы білім беретін оқу орындарының басшыларымен кездесіп, қалыптасқан криминогендік жағдайды талқылады.

Кездесудің басты тақырыбы кәмелетке толмағандардың қатысуымен және оларға қатысты жасалған қылмыстар мен құқық бұзушылықтардың алдын алу мәселесі болды. Іс-шараға облыстық басқарма мен қалалық білім бөлімінің басшылары, колледж басшылары мен Орал жалпы білім беретін мектептерінің директорлары қатысты.

Полиция департаментінің басшысы атап өткендей, статистикалық деректер негізінде криминогендік жағдайды зерделеу кезінде кәмелетке толмағандардың қатысуымен қылмыстар саны артып келе жатқаны байқалады. Ол сондай-ақ жұмыстың кемшіліктері туралы ашық айту, қазіргі заманның талаптарына сәйкес келетін мәселені шешудің жаңа жолдарын табу қажеттігін атап өтті.

БҚО ПД деректері бойынша ағымдағы жылдың 10 айында кәмелетке толмағандар жасаған қылмыстар саны 26,1% — ға өсті, олардың басым бөлігі облыс орталығының аумағында тіркелген. 87 қылмысты 82 кәмелетке толмаған адам жасады, оның 48 – і білім беру мекемелерінің оқушылары. Сондай-ақ есірткіге қатысты төрт қылмыстық іс тіркелді. Қалалық білім беру ұйымдарының қабырғасында 14 қылмыс жасалды, оның ішінде сегіз ұрлық, екі алаяқтық, денсаулыққа орташа ауырлықтағы зиян келтірудің бір фактісі.

Сонымен қатар, полицейлер кәмелетке толмағандарға қарсы жасалған қылмыстардың 12,9% — ға төмендегенін атап өтті.