БҚО полицейлері есірткі зертханасы жұмысының жолын кесті
Орал қаласының 36 жасар тұрғыны саяжай қоғамдарында жалға берілетін коттедждердің бірінде құрамында есірткі бар өсімдіктерді өсіретін есірткі зертханасын жасақтаған.
“Құқықтық тәртіп” жедел профилактикалық іс-шарасы барысында БҚО ПД есірткіге қарсы іс-қимыл басқармасының және Орал қаласы ПБ қызметкерлері есірткі зертханасы жұмысының жолын кесті, – деп хабарлайды Polisia.kz.
2023 жылғы 23 қараша күні Орал қаласының 36 жасар тұрғыны саяжай қоғамдарында жалға берілетін коттедждердің бірінде құрамында есірткі бар өсімдіктерді өсіретін есірткі зертханасын жасақтаған.
Тінту кезінде 7 түп қарасора өсімдігі, 5 дана полиэтилен пакеті, арнайы иісі бар жасыл түсті өсімдік салынған пластикалық ыдыстар табылып, тәркіленді.
Сондай-ақ өсімдіктерді өсіруге арналған электр жабдықтары мен тыңайтқыштар, газ шығару жүйесі мен зип-пакеттер, изолента, электронды таразы тәркіленді.
2023 жылғы 30 қарашадағы сараптама қорытындысына сәйкес тәркіленген заттар 298,21 грамм кептірілген марихуана және 235,62 грамм қарасора екендігі анықталды.
Аталған факті бойынша ҚР ҚК-нің 296-бабы 4-бөлігіне сәйкес (Есірткі, психотроптық заттармен, сол тектестермен өткізу мақсатынсыз заңсыз жұмыс істеу) сотқа дейінгі тергеу амалдары басталды.
