Оралдық жігіт қызға «тосын сый» уәде етіп, несие алуға мәжбүрлеген
Орал тұрғыны Шымкентте қарақшылық жасады деген күдікпен ұсталды.
Шымкентте бойжеткенмен әлеуметтік желіде танысқан жігіт оған “тосын сый жасаймын” деп пәтерге апарып қарақшылық жасаған, деп жазады Polisia.kz порталы.
Қала тұрғыны бірнеше күн бұрын интернетте танысқан жігітпен сөйлескен. Жігіт қызға тосынсый дайындағанын айтып, көзін байлап, пәтерге алдап кіргізген. Кейін қыздың қолын байлап, асүй пышағымен қорқытып, оны онлайн шағын несиеге өтініш беруге мәжбүрлеген.
“Қаскүнем ақшаны дереу есепшотына аудартып, оқиға орнынан бой тасалаған. Жігіт бірнеше сағаттың ішінде қаладағы Арбатта ұсталды . Ол жақында ғана мегаполиске ақша табу мақсатында келген Орал қаласының тұрғыны болып шықты”, – делінген хабарламада.
Күдікті ізін суытпай уақытша ұстау изоляторына қамалды.
