БҚО-да облыстық жолдарда 9 мердігер күтіп ұстау жұмыстарын жүргізеді
14 бағыт бойынша облыстық жолдарды күтіп ұстау жөнінде 2021-2023 жылдарға келісімшарт жасалған.
Батыс Қазақстанда облыстық маңызы бар 1 488 км автомобиль жолына 9 мердігер күтіп ұстау жұмыстарын жүргізеді, деп хабарлайды Kazinform.
БҚО жолаушылар көлігі және автомобиль жолдары басқармасының басшысы Бауыржан Айтмағамбетовтің өңірлік коммуникациялар қызметі алаңында өткен брифингіде мәлім еткеніндей, 132 км жол учаскесіне қайта жаңарту жұмыстары жүргізіліп жатыр. Бұл учаскелер бойынша мердігер ұйымдар қызмет көрсетеді.
Бауыржан Есқайырұлының сөзіне қарағанда, 14 бағыт бойынша облыстық жолдарды күтіп ұстау жөнінде 2021-2023 жылдарға келісімшарт жасалған.
«Мердігерлермен жасалған келісімшарт мерзімі биылғы 31 желтоқсанда аяқталады. Осыған сәйкес қазіргі уақытта облыстық жолдарды 2024-2026 жылдары ағымдағы жөндеу және күтіп ұстау жұмыстары бойынша конкурстық рәсімдер жүргізіліп жатыр. Кейде жолдарды уақытылы тегістеу жұмыстары жүргізілмей қалған жағдайлар болып жатады. Ондай кезде басқарма тарапынан жұмысты толыққанды орындау жөнінде ескерту беріледі. Мерзімінде орындалмаған жағдайда мердігерге айыппұл есептеліп, тіпті келісімшартты бір жақты бұзуға тура келеді», – дейді Б.Айтмағамбетов.
Басқарма мәліметі бойынша облыстық жолдарды күтіп ұстаушы мердігер ұйымдардың иелігінде 98 арнайы техника, 8 тіркемелі грейдер және патрульдік жеңіл автокөліктер бар. Қардан тазалау жұмыстары көлік көп жүретін жолдарда бірінші кезекте 2-4 сағат аралығында атқарылады. Барлық автомобиль жолдары қар түскеннен кейін 24 сағат ішінде тазаланады. Сол секілді республикалық маңызы бар 1 032 км автомобиль жолын «КАЖСервис» ЖШС БҚО филиалы күтіп ұстайды. Күрделі жөндеу қаралған 245 км және қайта құрудан өтіп жатқан 72 км жол учаскесіне мердігер ұйымдар жауапты.
Қысқы кезеңде «КАЖСервис» ЖШС-дан 63 техника қызмет көрсетеді. Сонымен қатар автокөліктердің үздіксіз және қауіпсіз өтуін қамтамасыз ету және қолайсыз ауа райының алдын алу мақсатында басқа ұйымдардан 12 жол-құрылыс техникасын алуға келісімшарт жасалған.
«Көктайғаққа қарсы материалдар дайындау – қысқы күтімнің ажырамас бөлігі. Сондықтан алдағы кезеңге республикалық жолдарда 1 6200 тонна құм-тұз қоспасын әзірлеу жоспарланса, соның 7 550 тоннасы әкелінген. Қосымша 1 375 тонна тұз жеткізілмекші. Оған қоса облыстық жолдар үшін материалдар толықтай дайын. Қыс кезінде жолда кез келген жағдай болуы ықтимал. Республикалық жолда жүру мүмкіндігі қиындаса, 1403 нөмірі бойынша call-орталыққа хабарласуға болады. Сондай-ақ облыстық жолда көлік бұзылса, жүргізуші басқалай жағдайға тап келсе, +7 771 179 63 92 қоңырау шалуға немесе WhatsApp желісіне хабарлама қалдыруға болады», – деді Б.Айтмағамбетов.
