БҚО-да тұман мен көктайғақ күтіледі

Қазақстандық синоптиктер алдағы үш күнге – 2023 жылғы 23-25 ​​желтоқсан аралығындағы күн райы болжамын ұсынды.

«Қазгидрометтің» мәліметінше, 23 желтоқсанда БҚО батысы мен оңтүстігінде тұман мен көктайғақ күтіледі.

Орал қаласында ауыспалы бұлттылық күтілуде. Күндізгі уақытта ауа температурасы -1 …+ 1 градус болады, түнде -1 …-3 градусқа дейін салқындайды. Жел секундына 14 метрге дейін жетеді.

Түнде және таңертең Батыс Қазақстан облысының батысында тұман болады деп күтіледі. Түнде облыстың солтүстік-шығысында, шығысында, күндіз облыстың шығысында, оңтүстігінде оңтүстік-шығыстан, оңтүстіктен 15-20 м/с жылдамдықпен жел соғады.

«Ертеңнен бастап Қазақстан аумағына ылғалы мол атлантикалық циклон жырасы жақындап келеді, ол алдымен республиканың батыс облыстарын, ал 24 желтоқсаннан бастап еліміздің басым бөлігін жауып, қар аралас жаңбыр түріндегі жауын-шашын әкеледі, көктайғақ болады, солтүстік өңірлерде тұман, көктайғақ, бұрқасын болып, жел күшейеді», – делінген хабарламада.

Болжам бойынша, тек республиканың шығысы мен оңтүстік-шығысында күн жауын-шашынсыз болады.

Синоптиктер температура фонында айтарлықтай өзгеріс болмайтынын атап өтті.