Мәжілісте жаңа туған нәрестелерге арналған ЖСН-ға түзетулер бекітілді
Мәжіліс депутаттары байланыс, цифрландыру және ақпараттандыру саласындағы инвестициялық ахуалды жақсарту мәселелері бойынша түзетулерді бірінші оқылымда мақұлдады. Заң жобасында басқалармен қатар жаңа туған нәрестелерге ЖСН беру қарастырылған.
Заң жобасы Мәжіліс депутаттарының бастамасымен әзірленген. Ол мемлекет басшысының тапсырмасын орындауға бағытталған.
Жаңа норма кейбір заңнамалық актілерге байланыс, цифрландыру және ақпараттандыру саласының инвестициялық ахуалын арттыру мәселелері бойынша өзгерістер енгізу туралы заң жобасында қарастырылған.
Оған сәйкес, жаңа туған нәрестенің жеке деректерін жоғалту қаупін болдырмау үшін бала туғаннан кейін бірден, алғашқы 20 минут ішінде жеке сәйкестендіру нөмірін (ЖСН) беру ұсынылып отыр. Депутаттар осылайша алаяқтық және адам ұрлау сияқты қылмыстарға тосқауыл қоймақ.
Мәжіліс депутаты Екатерина Смышляева түсіндіргендей, қазір ЖСН сәбиге туу туралы куәлікті рәсімдеген кезде беріледі. Ал куәлікті рәсімдеу үшін балаға ең алдымен ат қою керек.
«Ата-ана сәбиіне қандай есім қоятынын ойластырып жатқанда, біраз уақыт өтіп кетеді. Кейде заңда қарастырылған мерзім сақталмайды, тіпті кейде ЖСН мүлде тіркелмейді. Мұндай жайттар болды. Сол себепті біз туу туралы куәлікті күтпей, нәрестеге дүниеге келген сәтте бірден ЖСН беруді ұсынып отырмыз», – деді Смышляева мәжіліс кулуарында.
Депутаттың айтуынша, бұл медициналық ақпараттық жүйеде автоматты түрде жасалады. Дүниеге келген сәби еліміздің барлық ақпараттық жүйесінде азамат ретінде тіркеледі.
