БҚО өңірлік кадр резервіне 15 үміткер іріктеледі

Іріктеуге 35 жастан аспаған, жоғары білімі, кемінде үш жыл жұмыс өтілі бар жастар қатыса алады.

Іріктеу 1 наурызда басталады және кадр тапшылығына байланысты іріктеу жеті салалық бағыт бойынша өтеді.

Облыс әкімдігінің ақпараты бойынша, 1 наурыздан бастап өңірлік кадрлық резервке іріктеу басталады, оның құрамы конкурстық негізде облыстың жас талантты мамандарының арасынан іріктелетін болады.

Әр өңірде өзінің өңірлік кадр резерві қалыптастырылатын болады. Іріктеуге 35 жастан аспаған, жоғары білімі, кемінде үш жыл жұмыс өтілі бар жастар қатыса алады. Бұл өңірдің дамуына өз үлесін қосуға дайын жастар үшін мемлекеттік қызметке әлеуметтік өсу болады. Белгілі бір саладағы кадрлар тапшылығына сүйене отырып, іріктеу жүргізілетін жеті салалық бағыт бекітілді. Бұл индустрия және өнеркәсіп, экономика және қаржы, әлеуметтік сала, тұрғын үй-коммуналдық шаруашылық және инфрақұрылым, агроөнеркәсіптік кешен және жер қатынастары, цифрландыру, экология салалары. Іріктеудің ашықтығын қамтамасыз ету үшін өңірлік резервке қоғамдық бірлестіктердің, үкіметтік емес ұйымдардың, бұқаралық ақпарат құралдарының, бизнес-қоғамдастықтардың өкілдері және салалық сарапшылар тартылатын болады, — деп хабарлады ведомстводан.

Өңірлік кадр комиссиясының шешімімен резервке екі жыл мерзімге 15 кандидат қабылданатын болады. Алдағы уақытта оларды жергілікті атқарушы органдарда «Б» корпусының мемлекеттік әкімшілік лауазымдарына жұмысқа орналастыру бойынша жұмыстар жүргізілетін болады.