Тұрғындарды алдап соққан әйел қамауға алынды
Қадағалау органы соттан 33 жастағы әйелді екі айға қамауға алуды сұрады.
Облыстық соттың баспасөз қызметінің мәліметінше, мамандандырылған тергеу сотында Орал прокуратурасының өтініші қаралды. Қадағалау органы соттан 33 жастағы әйелді екі айға қамауға алуды сұрады. Ол аса ірі мөлшерде алаяқтық жасады деп күдіктенеді.
Тергеу мәліметтері бойынша, күдікті 2023 жылдан бастап өзінің материалдық жағдайын жақсарту мақсатында арзан тұрмыстық техниканы уәде етіп, қала тұрғындарын алдап келген.
Сенімді адамдар оған 124 миллион теңге берген. Енді сотқа дейінгі тергеу кезінде әйел қамауда болады.
Бүгінгі қоғамды алаңдатып отырған қылмыстың бірі – алаяқтық. «Аңқау елге – арамза молда» кейпіне енген алаяқтардың араны ашылып-ақ барады. Жеңіл жолмен табыс табуды көздегендердің қатары азаяр емес. «Ауырдың үстімен, жеңілдің астымен» дегендей, жеңіл жолмен табыс тауып, баюды көздегендердің дені – әйелдер. Алаяқтардың арбауына түсірген құрбандарының ақшасын қайтармай, тіпті із-түзсіз «жоғалып» кететіндер дер бар.
Өткен 2023 жылы өңірде 410 алаяқтық тіркеліп, соның 200-і анықталып, сотқа жолданған.
