Қазақстанда енді бұралқы және ауру иттер өлтіріледі
Мәжіліс депутаттары бұралқы иттердің санын қысқарту туралы заңды қарастырады.
«Жануарларға жауапкершілікпен қарау туралы» Қазақстан Республикасының Заңына өзгерістер мен толықтырулар енгізу туралы» заң жобасында жануарларға жауапкершілікпен қарау туралы айтылған.
Заңдағы негізгі нормалар:
- жануарларды есепке алудың бірыңғай электронды базасын орталықтандыру;
- жануарды уақытша ұстау орнына орналастырғанға дейін жануардың иесіне одан бас тартуға тыйым салуды белгілеу,
- сондай-ақ жануардың иесіне оны далаға тастамай, уақытша ұстау орнына өткізуді міндеттеу;
- жануарлар агрессия танытып, шабуылдаған жағдайларда жергілікті атқарушы органдардың осындай оқиғаларға шұғыл ден қою шараларын ұйымдастыру міндетін белгілеу;
- ауруға шалдыққан, агрессия көрсететін, зооқорғаныс ұйымдары мен өзге де тұлғалар орнастырмаған және талап етілмеген жануарлардың санын реттеу үшін, егер олар бұралқы иттер болса 15 күн ішінде, ал егер олар қараусыз қалған жануарлар болса 60 күн ішінде эвтаназия қолдану.
Балалардың қауіпсіздігін қамтамасыз етуге жергілікті атқарушы органдар жауапты. Олар осы сынды оқыс оқиғаларды болдырмау мақсатында дереу шаралар қолдануға міндетті. Алайда қабылданған шараларға қарамастан, қажетті қадамдар жеткіліксіз болып көрінеді.
Қазіргі жағдай балаларға, әсіресе, әлеуметтік осал отбасыларда тәрбиеленетін бүлдіршіндердің өмірі мен қауіпсіздігіне елеулі қауіп төндіріп отыр.
