Жұмыртқаның шекті бағасы енгізілуі мүмкін – сауда министрлігі
Жұмыртқа өндірушілер қауымдастығы мен құс фабрикаларының басшылары баға орнату мәселелерін және жұмыртқа бағасын тарифсіз реттеу шараларын талқылады.
Қазақстанда 1-санаттағы жұмыртқаның шекті бағасын енгізу бойынша келіссөздер басталды, деп хабарлайды сауда және интеграция министрлігінің баспасөз қызметі.
Бүгін сауда комитетінде кездесу өтті. Оған құс өсірушілер одағы, жұмыртқа өндірушілер қауымдастығы мен құс фабрикаларының басшылары келді. Жиынға қатысушылар баға орнату мәселелерін және жұмыртқа бағасын тарифсіз реттеу шараларын талқылады.
«Маусымдық қымбаттау кезеңінде жұмыртқа бағасының өсуіне жол бермеу мақсатында тараптар жыл соңына дейін бағаны белгілей отырып, 1-санаттағы жұмыртқа бағасын тұрақтандыру жөніндегі ынтымақтастық туралы меморандумның талаптарын қарастыруда», – делінген ресми хабарламада.
Айта кетері, 2023 жылы 30 қарашада Қазақстан құс өсірушілер одағы және жұмыртқа өндірушілер қауымдастығы арасында тауық жұмыртқасы бағасының өсуіне жол бермеу туралы меморандум жасалған болатын. Соның арқасында мереке алдында бағаның негізсіз өсуіне жол берілмеді.
