Батыс Қазақстанда күйеуін өлтіруге киллер жалдаған әйел: оқиғаның мән-жайы белгілі болды
Ерлі-зайыптылар 12 жасар бала мен мүлікті бөлісе алмаған.
БҚО полиция департаментінің бастығы Арман Оразалиев қылмысқа тапсырыс беруші жәбірленушінің 40 жастағы әйелі екенін айтты. Ол мүлікті және 12 жасар баланы 43 жастағы күйеуімен бөліскісі келмеген. Олар некеде шамамен 14 жылдай тұрған.
– Бұл оқиға Ақсайда болған. Ерлі-зайыптылардың бірнеше пәтері және бірлескен бизнесі бар екен. Тергеу мәліметтері бойынша, әйел 33 жастағы қылмысты ұйымдастырушыға 1,3 миллион теңге берген. Алдын ала мәліметтер бойынша, ол екі миллион теңге беруі керек еді. Бұл ақшаға күдікті тапанша сатып алып, ер адамды өлтіруі керек болатын. Біз дайындалып жатқан қылмыс туралы алдын ала білдік, ал күдіктілер 26 ақпанда ұсталды. Біз кісі өлтірудің алдын алдық, жәбірленуші тірі, жағдайы жақсы, – деді БҚО ПД бастығы.
Полиция қылмыстық істі кісі өлтіруге оқталу бабы бойынша тергеп жатыр. Күдіктілер 20 жылға дейін бас бостандығынан айыру жазасына кесіледі. Тергеу әрекеттері жүргізілуде. Бұрын ұсталғандар қылмыстық жауапкершілікке тартылмаған. Олар қазір қамауда отыр.
