Арнайы әлеуметтік төлем алған қазақстандықтардың саны екі мыңнан асты
1 қаңтардан бастап зиянды еңбек жағдайында жұмыс істейтін адамдарға берілетін арнайы әлеуметтік төлем енгізілді.
Еңбек және халықты әлеуметтік қорғау министрлігі арнайы әлеуметтік төлем алған қазақстандықтардың санын жариялады, деп хабарлайды Sputnik Қазақстан тілшісі.
Биыл 1 қаңтардан бастап зиянды еңбек жағдайында жұмыс істейтін адамдарға берілетін арнайы әлеуметтік төлем енгізілген болатын. Еңбек және халықты әлеуметтік қорғау вице-министрі Олжас Ордабаевтың айтуынша, жыл басынан бері жаңадан енгізілген жеңілдікті екі мыңнан астам адам пайдаланды.
«2024 жылғы 14 наурыздағы жағдай бойынша 2 693 адамға арнайы әлеуметтік төлем берілді. Жалпы сомасы 449,7 миллион теңге», – деді Ордабаев орталық коммуникациялар қызметінде өткен брифингте.
Еңбек жағдайы зиянды жұмыстарда істейтін қызметкерлер мынадай төлемдерден тұратын арнайы әлеуметтік төлемге үміткер бола алады:
- арнайы кәсіптік мемлекеттік жәрдемақы – 2 ең төменгі күнкөріс деңгейі мөлшерінде;
- зейнетақыға дейінгі аннуитеттік сақтандыру шарты бойынша сақтандыру төлемі – 1 ең төменгі күнкөріс деңгейі мөлшерінде;
- жұмыс берушінің қаражаты есебінен кәсіби төлем – 1 ең төменгі күнкөріс деңгейі мөлшерінде.
Бірыңғай жинақтаушы зейнетақы қорынан міндетті кәсіптік зейнетақы жарналары (МКЗЖ) есебінен қалыптастырылған зейнетақы төлемі жинақтауға байланысты.
Төлем мынадай жағдайда тағайындалады:
- 55 жасқа толғанда;
- қызметкер үшін 84 ай (7 жыл) үшін міндетті кәсіптік зейнетақы жарналарын төлеуді растау;
- зиянды еңбек жағдайлары бар жұмыстарда еңбек қызметін тоқтату немесе зиянды өндірістік факторлардың әсерін болдырмайтын басқа жұмысқа ауыстыру.
