БҚО-да су тасқыны қаупі сақталады
Қазіргі уақытта он елді мекен, сегізі Қаратөбе ауданында және Сырым мен Шыңғырлау аудандарында бір-бір елді мекен көлік қатынасынсыз қалды.
Бұл туралы брифингте БҚО ТЖ департаментінің бастығы Руслан Қасыбаев мәлім етті.
Департамент бастығының айтуынша, өңірде бүгінгі күні су тасқыны құбылыстарын жою және авариялық-құтқару жұмыстарын жүргізу жұмыстары жалғасуда. 3744 адам эвакуацияланды, оның ішінде 1455 бала. Қауіпсіз орындарға 900-ден астам ірі қара мал, 1800 бас ұсақ мал және 30 бас жылқы айдалды.
Барлығы 640 мың м3 астам еріген су сорылды, 104 мыңнан астам қап төселді.
Қазір облыс бойынша 1 мыңнан астам адам, 300-ден аса техника және 100-ден аса мотопомпа жұмылдырылды, олар күшейтілген режимде жұмыс жүргізуде.
«Шыңғырлау, Жақсыбай, Өлеңті, Бұлдырты өзендерінің суы арнасынан асуы салдарынан төрт ауданның 9 ауылында 384 үй суға кетті. Бұл көрсеткіштер нақтылану үстінде, жергілікті атқарушы органдардың комиссиясы тексергеннен кейін шығын есептеліп, суға кеткен үйлердің дәл саны анықталады. «Қазгидромет» РМК БҚО филиалының мәліметіне қарағанда, бүгіннен бастап күн жылына түсіп, соған байланысты қауіп сақталады. Тұрғындарды тыныштық сақтап, эвакуацияға дайын болуға шақырамын», – деді Р.Қасыбаев.
Облыстың автожолдарында 21 су өту және 30 шаю бар.
БҚО ТЖД жедел штабына 2 мыңнан аса, «қауырт желі» телефонына 244 қоңырау түсті.
Қазіргі уақытта жағдай тұрақты күрделі, бақылауда.
