Батыс Қазақстанда облыстық жол қақ айырылып, су шайып кетті

Оқиға 26 сәуір күні Ақжайық ауданы Көнеккеткен ауылдық округі аумағында болды.

БҚО Жолаушылар көлігі және автомобиль жолдары басқармасынан мәлім еткеніндей, оқиға 26 сәуір күні Ақжайық ауданы Көнеккеткен ауылдық округі аумағында болды.

«Сағат 08.10-да Көнеккеткен және Қамыстыкөл ауылдарының арасында облыстық маңызы бар Барбастау-Ақжайық-Индер автожолының 115-шақырымында жолды су шайып кетті (ұзындығы – 4-5 метр, ені – 8 метр). Осы тұста автокөлік қозғалысы тоқтатылды. Көліктер айналма жол арқылы қатынап жатыр. Зардап шеккендер жоқ елді мекендерге қауіп төнген жоқ. Оқиға орнында Полиция департаменті мен жергілікті атқарушы органдар өкілдері жұмыс істеп жатыр», – деп хабарлады ведомстводан.

Ақжайық ауданы Көнеккеткен ауылдық округінің әкімі Ұлдаш Қадырғалиева «Юнисерв» компаниясының қызметкерлері айналма жолды биіктеткеннен кейін Қамыстыкөл елді мекенімен арадағы байланыстың қалпына келтірілгенін жеткізді.

Батыс Қазақстан облысында жағдай тұрақталды. Төтенше жағдайлар және полиция департаментінің қызметкерлері бірлесіп, су басқан аумақтарын күзетуде.

Ендігі кезекте Жайық өзені ағысының төменгі жағында орналасқан Ақжайық ауданында су тасқынына қатысты жағдайды қатаң бақылауда ұстау.

Көмекке барған Ақтөбе, Түркістан облыстарының құтқарушылары Жайық өзенінің бойында орналасқан елді мекендерде су тасқынына қарсы іс-шаралар жүргізу үшін Батыс Қазақстаннан Атырау облысына жіберілді.