«Наурыз» жаңа ипотекалық бағдарламасы: неліктен бірқатар қазақстандықтардың өтінімдері қабылданбады
Отбасы банкі «Наурыз» жаңа ипотекалық бағдарламасы бойынша өтінім берген қазақстандықтардың өтінімдері неге мақұлданбағанын түсіндірді.
«Отбасы Банкі» Басқармасының төрағасы Ләззат Ибрагимованың айтуынша, жаңа тұрғын үй бағдарламасына қатысушылар арасында 35 жасқа дейінгі жас қазақстандықтар көш бастап тұр. «Наурыз» бағдарламасының ең жас өтініш берушісі-Түркістан облысының 18 жастағы тұрғыны.
10 мамырдағы жағдай бойынша қазақстандықтар барлығы 17 432 өтінім берді, алайда тек 8 945 өтінім қабылданды, олардың жартысы тұрғын үйге кезекте тұрған халықтың әлеуметтік осал топтарының өкілдерінен келіп түсті.
«Тағы 2 436 өтінім қабылданбады. Негізгі себеп-клиенттерде депозитте 1 млн теңге мөлшерінде қажетті сома жоқ. Бұл «Наурыз» бағдарламасына қатысудың міндетті шарты. Сондай – ақ тұрғын үйі бар азаматтардың өтінімдері де қабылданбады», — деп түсіндірді Ләззат Ибрагимова ОКҚ брифингінде.
5 008 өтінім беру процесінде. Яғни, мемлекеттік дерекқорлармен салыстыру жүргізілуде және жүйе ЭЦҚ өтініміне қол қоюды күтуде.
Алматы, Астана және Шымкент қалаларымен қатар тұрғын үй сатып алу үшін таңдалған 5 қала мен аймақтың қатарына Ақтөбе және Алматы облыстары кірді. «Наурыз» бағдарламасы бойынша өтінімдер жұмыс күндері сағат 9:00-ден 21:00-ге дейін «Баспана маркет» платформасында қабылданады.
Бағдарлама іске қосылған бірінші жылы 300 млрд теңге сомасына 12 мың қарыз және одан әрі жыл сайын 8 мың қарыз беру үшін 200 млрд теңгеден беру жоспарлануда.
Орталық филиал директоры Жансұлтан Матайдың айтуынша, ипотекаға рәсімделетін пәтерлерді Баспана маркет порталынан таңдау керек. Сол жерде баспананы брондау қызметі де бар.
«Іріктеуден өткен және төлем қабілеттілігін растаған кісілер қаланы аралап, уақыт жоғалтпайды. Баспана маркетте тізімге енген барлық құрылыс нысандары бар. Сол жерден таңдауға болады», — деді Матай орталық коммуникациялар қызметінде өткен брифингте.
Жаңадан сатып алынған үйді жөндеуге де ақша алуға болады. Бірақ оның көлемі ипотеканың 20 процентінен аспауы шарт.
«Наурыз» бағдарламасы аясында тұрғын үйді алғашқы нарықтан, сондай-ақ моноқалалар мен ауылдық елді мекендерде екінші нарықтан сатып алуға болады. Заемның ең жоғарғы мөлшері: Алматы мен Астана қалалары үшін — 36 млн теңгеге дейін, қалған өңірлер үшін – 30 млн теңгеге дейін.
Бағдарлама шарты:
- алғашқы жарна — 20%;
- Тұрғын үй кезегінде тұрған азаматтардың әлеуметтік осал санаттары үшін несие бойынша мөлшерлеме — 7%;
- азаматтардың барлық санаты үшін несие бойынша мөлшерлеме — 9%;
- несие мерзімі — 19 жылға дейін.
ОҚИ ОТЫРЫҢЫЗ: Жаңа ипотека. Несие тарихы маңызды ма, жер үй алуға бола ма, көпбалалыларға жеңілдік бола ма
