Оралдағы су басқан саяжай қоғамдарынан су қалай сорылып жатыр

Саяжай қоғамдарының көптеген учаскелері әлі суда тұр.

БҚО ТЖ департаментінің баспасөз қызметінен мәлім еткеніндей, күні бүгін Орал қаласында «Речник», «Венера», «Евразия» лагері, «Курени» аудандары, «Березка 1», «Березка 2», «Автомобилист», «Мичуринское» («Самал 3»), «Труд», «Волна» (телеорталық ауданы), «Восход» бау-бақша бірлестіктері және Бәйтерек ауданы Мичурин кенті маңдарында жерасты суларын сору жұмыстары жүргізіліп жатыр.

Департамент мамандарының түсіндіруінше, жерасты сулары жер бетіне шығып кетіп жатыр.

«Қазіргі таңда Орал қаласында жерасты суларын соруға жеке құрамнан 34 адам, 8 техника, 26 мотопомпа, 2 СНП-500 сорғысы тартылған. Сондай-ақ Бәйтерек ауданы Мичурин кентінде 2 адам 1 техника, 1 мотопомпамен жұмыс жасауда. Осы кезге дейін облыс бойынша барлығы 2 млн 543,516 мың текше метр су сорылды. Сонымен қатар төтенше жағдайлар департаменті және полиция департаменті қызметкерлері су басқан аумақтарды патрульдеу ісін атқаруда», – деп хабарлады ведомстводан.

«Қазгидромет» РМК БҚО филиалының 17 мамыр күнгі сағат 08.00-дегі мәліметі бойынша Жайық өзеніндегі су деңгейі бір тәулікте Бәйтерек ауданы Январцев ауылы тұсында 7 ( қазіргі деңгейі – 727 см), Оралда 5 (733 см), Көшімде 2 (762 см), Тайпақта 8 (900 см) сантиметрге түсті. Сондай-ақ Көшім каналында 4 сантиметрге (712 см) төмендеді.